परदेशमा छु आफु, घर सम्हाल्ने एक्ली आमा ।

चर्किएको घर भित्ता पिँढी टाल्ने एक्ली आमा ।

 

बुढेसकालले  छोएको  छ  साहस  उस्तै  अझै

पिर ब्यथाले पनि गाल्दै नगाल्ने  एक्ली आमा ।

 

चकमन्न हुन्थ्यो होला उनी बिना घरको जंघार

साँझ बिहान दियोमा दिप बाल्ने एक्ली  आमा ।

 

मेलापातको  खाजा लुकाइ छिपाई ल्याउथिन् 

आफ्नो पेट मारी मलाई पाल्ने एक्ली आमा।

 

हजारौं गल्ती  ढाकछोप गर्छिन् चोट  पर्ला भनी

सधैं मेरो बिरामको दाग पखाल्ने एक्ली आमा ।

 

संगीता शर्मा

कुसुन्ति-१३, ललितपुर

हाल इटाली